പെണ്‍ചിന്തകള്‍

സ്ത്രീ പക്ഷത്തും സ്ത്രീ വിരുദ്ധപക്ഷത്തും 
ഒപ്പത്തിനൊപ്പം സ്ത്രീകളുണ്ട് എന്നത് തന്നെയാണ് 
സന്തോഷവും സങ്കടവും .
_
കാണുമ്പോള്‍ കെട്ടിപ്പിടിക്കാനും 
കാണാമറയത്ത് ആകുമ്പോള്‍
തലകീഴായി കെട്ടിത്തൂക്കാനും
ഒട്ടും മടിയില്ലാത്തവര്‍ തന്നെയാണ് പെണ്ണുങ്ങള്‍ .
__
അമ്മയില്‍ നിന്നും തുടങ്ങി
സ്വയം അമ്മായിയമ്മയുടെ റോളില്‍ എത്തുമ്പോഴും
വിഷംപുരട്ടി പരസ്പരം ഊട്ടുന്നതിനും
മടിക്കാത്തവര്‍ തന്നെ സ്ത്രീകള്‍ .
__
ജീവിതത്തില്‍ പലരെയും കണ്ണീരു കുടിപ്പിക്കാനും
മറ്റുള്ളവരുടെ ജീവിതം കണ്ടും പറഞ്ഞും
കണ്ണീരോഴുക്കുവാനും മിടുക്കുള്ളവര്‍ .
__
പെണ്‍ സ്വാതന്ത്ര്യത്തിനെതിരെ
വടിയൊടിക്കുന്നതും ഓങ്ങുന്നതും
അടിക്കുവാന്‍ പിടിച്ചു കൊടുക്കുന്നതും
അതെ പെണ്‍വര്‍ഗ്ഗജീവികള്‍ തന്നെ മുന്നില്‍ .
__
സര്‍വ്വം സഹയായ കുറെ സാധുക്കള്‍ക്കിടയില്‍ സര്‍വ്വസംഹാരിണിയായും അവളുണ്ട് .
__
പുരുഷന്‍ പലപ്പോഴും
മുന്നില്‍ നിന്നു കുത്താനായുമ്പോള്‍
സ്ത്രീ പിന്നില്‍ നിന്നും ആഞ്ഞോടിയെത്തി
പലവട്ടം മുറിവേല്‍പ്പിച്ചിരിക്കും .
__
ശാന്തമായ് ചേര്‍ത്ത് തലോടുന്നവരേക്കാള്‍
അശാന്തിക്ക് വളമിട്ടു വഷളാക്കുന്നവരാണ്
സ്ത്രീകളില്‍ അധികവും.
__
കൈ പിടിക്കുകയും അഭിനന്ദിക്കുകയും ചെയ്യുമ്പോഴും
അസൂയയും അസഹിഷ്ണുതകളും
കൊണ്ട് മിക്കസ്ത്രീകളും അസ്വസ്ഥരായിരിക്കും.
__
അവള്‍ ഉള്ളത് കൊണ്ട് ഓണം വരുത്തും
മറ്റുള്ളവര്‍ക്ക് വിളമ്പിക്കൊടുത്ത്
ഇല്ലാത്തതുകൊണ്ട് വയര്‍ നിറയ്ക്കും .
__
ഒരുകുഞ്ഞു തീപ്പൊരി ഊതിപ്പടര്‍ത്തി
സ്വയം വേവും മറ്റുള്ളവരെയും പൊള്ളിക്കും .
ഭൂമിയോളം താഴും
ആകാശത്തോളം പ്രതികാരം ചെയ്യും .
__
ചുരുക്കത്തില്‍
വെളിച്ചവും അവള്‍ തന്നെ
ഇരുട്ടും അവളുടെ സൃഷ്ടിതന്നെ
അമ്മയും ദേവിയും അവള്‍തന്നെ
അസ്ത്രവും വിഷവും അവള്‍ തന്നെ .
മൃദുലമായ പൂവും
മെരുക്കമില്ലാത്ത മുള്ളും അവള്‍തന്നെ .
അങ്ങിനെയങ്ങിനെ ഒരേ നാണയത്തിന്‍റെ
ഇരുപുറം പോലെ തന്നെ അവളും.
___
പെണ്ണിന് ശത്രു പലപ്പോഴും പെണ്ണുതന്നെ എന്ന്
കുറെ പെണ്ണുങ്ങള്‍ സമ്മതിക്കാതിരിക്കില്ല :)
അടച്ചാക്ഷേപം ഒന്നിനോടും ഇല്ല എങ്കിലും
പറയാന്‍ ഏറെ ബാക്കിയുണ്ട് പെണ്‍വിരുദ്ധത .
കണ്ടതും അറിഞ്ഞതും എന്നില്‍ ഉള്ളതും എല്ലാമിതിലുണ്ട് :D

പെണ്ണെ,വരിവരിയായ് നില്‍ക്കുന്നീ
അറ്റം കാണാത്ത വരിയില്‍
തുടക്കമോ ഒടുക്കമോ ഊഴമോ അറിയാതെ ഞാനും .
അവിടവിടെ ഒരേമുഖച്ഛായയുള്ള നിലവിളികള്‍ 
കുന്നുകൂടുമ്പോള്‍ , 
എനിക്ക് കവിതയെഴുതാന്‍ മുട്ടുന്നു.
ഇരകളാകും വരെ നമ്മള്‍ സുരക്ഷിതരാണ്‌ എന്നു

വയറുനിറഞ്ഞതിന്‍ മീതെ ഉറക്കം വരുന്നു .

*******************************************************************

നാം കണ്ണടച്ചിരിക്കുന്ന വിശപ്പുകള്‍

വിശപ്പുകൊണ്ട് മാത്രം മരണത്തെ തിരഞ്ഞെടുക്കേണ്ടി വരുന്നതിന്‍റെ ആ നിസ്സഹായത എത്ര ഭീകരമാണ്.മക്കള്‍ക്ക് ദിവസവും നെയ്യും പാലും വാരിക്കോരി ക്കൊടുത്തിട്ടും അവര്‍ കഴിക്കുന്നില്ലെന്ന്‍ സങ്കടം പറയുന്ന നീയും ഞാനുമടക്കം പലരും തലതാഴ്ത്തി തന്നെ നില്‍ക്കണം.

ഇന്ന് നമ്മള്‍ അടുത്തവീട്ടിലെ കുഞ്ഞുങ്ങളുടെ കരച്ചില്‍ കേള്‍ക്കാന്‍ ആകാത്തവിധമുള്ള മതിലുകള്‍ കെട്ടുന്ന തിരക്കിലാണ് . അവനവന്റെ വിശപ്പും സുരക്ഷയും മാത്രമാണ് നമ്മുടെ ലോകം .ദിവസവും ഒരു സങ്കോചവും കൂടാതെ പാഴാക്കുന്ന ഭക്ഷണം അടുത്തവന്റെ വിശപ്പിലേക്കുള്ളത് കൂടിയാണ് എന്നത് നമ്മുടെ വിഷയമല്ല. അടുത്തുള്ളവരെ എന്നതിനേക്കാള്‍ അകലെയുള്ളവരെ സഹായിക്കാനും അവര്‍ക്കുവേണ്ടി വാപിളര്‍ത്തി ഒച്ചയുണ്ടാക്കാനും ആണ് നമുക്ക് ആവേശം.അതിനാണ് ഇന്ന് മാര്‍ക്കെറ്റും വാര്‍ത്തകളില്‍ സ്ഥാനവും .

സ്വന്തം രാജ്യത്തെ(സ്വന്തം നാട്ടിലെ അതുമല്ല ഇപ്പോള്‍ അത് അതിലും അടുത്തെത്തി യിരിക്കുന്നു ) വിശപ്പുകള്‍ ഇങ്ങനെ തൂങ്ങിയാ ടുമ്പോള്‍ വിദേശിയുടെ പെട്ടിക്കടയില്‍ നിന്നും വാങ്ങുന്ന അനാവശ്യങ്ങള്‍ കൊണ്ട് നമ്മുടെ സല്‍ക്കാരങ്ങളെ കുത്തിനിറച്ച് നാമിങ്ങനെ ത്തന്നെ ഇനിയും ഞെളിഞ്ഞു നിന്ന് നമുക്കുള്ള കയ്യടികള്‍ ആസ്വദിക്കും .

നാലുനേരം ഉണ്ണുന്നവന് ഒരുനേരത്തെ വിശപ്പിനെ പോലും നേരിടാനുള്ള കഴിവില്ല. ആവശ്യത്തിലധികം വയറുനിറയു ന്നതുകൊണ്ടുള്ള അസ്വസ്ഥത കൊണ്ടുമാത്രം പട്ടിണി കിടക്കുന്നവരാണ് നമ്മള്‍ .

കീബോര്‍ഡുകളിലെ കറുത്ത ചതുരാക്ഷരങ്ങള്‍ യാതൊരു വികാരവുമില്ലാതെ ചന്തയില്‍ കൊണ്ടുവച്ചിങ്ങനെ പ്രതികരിക്കുകയും കുറ്റം പറയുകയും മാത്രം ചെയ്തുകൊണ്ടിരിക്കുന്ന ഒരു പുതിയ സംസ്കാരത്തിന്റെ ഇരകള്കൂടിയാണ് നാം.

വാര്‍ത്തകള്‍ക്ക് പഞ്ഞമില്ലാത്ത നാടാണ് സുഹൃത്തെ ചൂടാറുന്ന  ശവശരീരങ്ങള്‍ക്കൊപ്പം നമ്മുടെ നാക്കുകളും ചിന്തകളും നമ്മള്‍ പൂട്ടിവക്കുന്നു.
തൊണ്ടപൊട്ടുമാറുള്ള മുദ്രാവാക്യമോ അവനവന്‍ പ്രസ്ഥാനങ്ങളെ മാത്രം കാണാനും കാടുപിടിപ്പിക്കാനും ഉള്ള ആവേശങ്ങളുമല്ല വേണ്ടത് സുഹൃത്തേ,കാടിന്‍റെ മക്കളില്‍ നിന്ന് അവരുടെ ജീവിതവും ജീവനും പിടിച്ചു പറിച്ചിട്ടു അവരെ പട്ടിണിക്കിടുന്ന രാജാക്കന്‍ മാരും പ്രജകളും, ഇതിനു മറുപടി പറയെണ്ടിവരുന്ന കാലത്തെ നേരിടാന്‍ ഒരുങ്ങിയിരുന്നുകൊള്ളുക .

മാപ്പ് ചോദിക്കാന്‍ പോലും പ്രതികാരത്തിന്‍റെകാലം കാത്തുനിന്നു എന്നുവരില്ല .

********************************************************************

ആ  വാര്‍ത്ത  തെറ്റായി  റിപ്പോര്‍ട്ട്  ചെയ്ത  ഒന്നായിരുന്നു   എന്നറിയുന്നു .

വാര്‍ത്തകളെ സെന്‍സേഷണല്‍ ആക്കി മുതലെടുക്കുന്ന പുതുമാധ്യമ ധര്‍മ്മപരിപാലകരുടെ വാര്‍ത്തകളെ നമ്മള്‍ ഇനിയും എങ്ങനെ വിശ്വസിക്കും എന്ന് അറിയുന്നില്ല. കഷ്ട്ടം തന്നെ . ജനങ്ങളെ മുഴുവന്‍ വിഡ്ഢികള്‍ ആക്കുന്നതരത്തിലുള്ള മാധ്യമ പ്രവൃത്തനം നടത്തുന്നതിലും നല്ലത് വേറെ വല്ല പണിക്കും പോകുന്നതാണ് . ഇങ്ങനെ ഉള്ളവര്‍ക്കെതിരെയും കടുത്ത നടപടികള്‍ എടുക്കാന്‍ നിയമം ഉണ്ടാകണം എന്നാണു ഇപ്പോള്‍ തോന്നുന്നത് .

വാര്‍ത്തകള്‍ ഇടുന്നവരെ ആദ്യം നമിക്കണം ,, ഇപ്പൊ പലതവണ ആയി സത്യാവസ്ഥ മറച്ചുള്ള റിപ്പോര്‍ട്ടിഗ് ,,

സ്നേഹം !

സ്നേഹമെന്നത്

മതങ്ങളുടെ ഉച്ചകോടിയില്‍ നിന്നും 

പുറത്താക്കപ്പെട്ട വിശുദ്ധരാജ്യമാണ് .

********മൊണാലിസ***********

സ്വാതന്ത്ര്യം ഇന്നൊരു വിശുദ്ധ പശുവാണ്‌ !

സ്വാതന്ത്ര്യം  ഇന്നൊരു  വിശുദ്ധ പശുവാണ്‌ !കടുത്ത ചാട്ടയടിയേല്‍ക്കുന്ന ജനതയുടെ ഉടലുകള്‍തൂങ്ങിയാടുന്ന  കൊടിമരങ്ങളാണ് ഇന്നതിന്റെ അടയാളം .

മനുഷ്യരെക്കാള്‍  മൃഗങ്ങള്‍ക്ക് സുരക്ഷിതത്വം വേണമെന്ന്  വാശിപിടിക്കുന്ന മതരാഷ്ട്രീയാന്തരീക്ഷമുള്ള  രാജ്യമാണ് ഇപ്പോള്‍ നമ്മുടേത്‌ .വിപ്ലവമാണ് ഇന്ന് പലരുടെയും സ്വര്‍ഗ്ഗം ,സൂക്ഷിക്കണം  ചോരയാണ്  അതിലെ സമവാക്യങ്ങള്‍ .ചുറ്റിലും  പതിയിരിക്കുന്നത്  മനുഷ്യനീതി മറന്നുപോയ  കൊലച്ചിരികള്‍ .ഒരേ ഭക്ഷണം തന്നെ  മനുഷ്യനെ  ജീവിപ്പിക്കുകയും  കൊല്ലുകയും ചെയ്യുമെന്ന് തെളിയിക്കുന്നവരുടെ  കുറുവടിയോങ്ങലുകളില്‍ പുതിയ കുരുതികള്‍ തുടരുകയാണ് .

അടുത്തവന്റെ  വീട്ടിലെ  ചിരിമായുന്നതും  കണ്ട് മടങ്ങി വരുമ്പോള്‍   നാമനുഭവിക്കുന്ന ആശ്വാസം നൂല്‍ബലം പോലുമില്ലാത്തതാണ്  എന്ന തിരിച്ചറിവിനു നമ്മുടെയൊരു  വിശപ്പിന്‍റെ ഇടവേളമാത്രം . 

ഏതു മതമോ  രാഷ്ട്രീയമോ  ആവട്ടെ  .വിശപ്പില്‍  വിപ്ലവം  കലര്‍ത്തുന്നതിനെ ഒരു  ന്യായത്തിലും     തളച്ചിടുവാന്‍  സാധിക്കില്ല .അതിനുതക്കതായ മറുപടി കയ്യില്‍  കാത്തുവക്കുന്നത്  ഉചിതമായിരിക്കും , കാലം  കണക്കു  തീര്‍ക്കുന്ന ചിലതില്‍ എണ്ണപ്പെടുന്നതുവരെ  നിങ്ങള്‍  സുരക്ഷിതരാണ്‌ .

പറയാന്‍ തോന്നി പറഞ്ഞു .

ഇന്നത്തെ വൈറല്‍ ആയിക്കൊണ്ടിരിക്കുന്ന കേരളവര്‍മ്മ വിഷയത്തില്‍ ടീച്ചറെ അനുകൂലിച്ചും വിമര്‍ശിച്ചും പതിവുപോലെ പക്ഷം ചേരാതെ കാഴ്‌ച്ചക്കാരായും നമുക്കിടയില്‍ പലരും ഉണ്ടായിരുന്നു.രാഷ്ട്രീയത്തെ എതിര്‍ക്കുകയോ അതില്‍ ഇടപെടുകയോ അല്ല ടീച്ചര്‍ എന്ന രീതിയില്‍ അവര്‍ ചെയ്തത് എന്ന് തോന്നുന്നു. ഒരു അമ്മ തന്റെ മക്കളുടെ കൂടെ നില്‍ക്കുന്നു എന്നപോലെ ഉള്ള ഒരുനിലപാട് കൂടിയാണത്.തന്‍റെ പ്രവൃത്തന മേഖലയില്‍ ഉണ്ടായ ഒരു വിഷയത്തില്‍ മാന്യമായ നിലപാട് അവര്‍ തുറന്നു പറഞ്ഞു.ക്രിമിനല്‍ കുറ്റം അല്ലെന്നു ഭൂരിഭാഗത്തിനും ഉറപ്പുള്ള ഒരു കാര്യത്തില്‍ ഇടപെട്ടതുകൊണ്ട്‌ മാത്രം ഒരാളെ അവഹേളിക്കുന്ന രീതിയില്‍ എടുക്കുന്ന നടപടിയിലെ സ്വാധീനശക്തിയെ കണ്ടു ഭയം തോന്നുന്നു .വിദ്യയേക്കാള്‍ ആചാരങ്ങള്‍ക്കുള്ളിലെ അനാചാരങ്ങള്‍ക്ക് കണ്ഠകൌപീനവും ചാര്‍ത്തി കാവല്‍നില്‍ക്കുന്ന കുറേപ്പേരുടെ പാവക്കൂത്ത് എന്നും തോന്നിപ്പോയി.

അതിനോടൊപ്പം പുരോഗമനാത്മകമെന്ന് പറയുന്ന ചില സമര രീതികളോടെങ്കിലും മുഴുവനായി അനുകൂലനിലപാട് തോന്നാറില്ലെന്നും തുറന്നു പറയാം .അങ്ങനെ പലതിനെയും പന്നിയെയോ പോത്തിനെയോ കൊണ്ട് നേരിടാമെന്നും സ്വപ്നം കാണുന്നുമില്ല .അതിനര്‍ത്ഥം എല്ലാ കടന്നു കയറ്റങ്ങളോടും സമരസപ്പെടുകയാണ് ബുദ്ധി എന്നതുമല്ല .ചില ആവേശങ്ങളില്‍ കോമാളീകരിക്കപ്പെട്ട് പോകുന്നതില്‍ നിന്നും മാറ്റിനിറുത്തപ്പെടാന്‍ അര്‍ഹതയുള്ള ചിലതുകൂടി ഉണ്ടല്ലോ എന്നോര്‍ക്കുന്നു അത്രമാത്രം .

ഫെമിനിസം പോലെതന്നെ ഫാസിസവും വളരെ വേഗം തെറ്റിദ്ധരിക്കപ്പെടാനും വേണ്ടിടത്തും വേണ്ടാത്തിടത്തും ഒക്കെ ഉപയോഗിക്കപ്പെടാനും ഉള്ള സാധ്യത കൂടി കാണുന്നു.കുളം കലക്കി മീന്‍പിടുത്തം അറിയുന്നവര്‍ ഈ ബഹളങ്ങളില്‍ തങ്ങളുടെ കുട്ട കുത്തിനിറച്ചു മൂളിപ്പാട്ട് പാടിയങ്ങ് സിമ്പിള്‍ ആയി അങ്ങ് പോകുകേം ചെയ്യും.കുളവക്കത്ത് കനലും ചാരവും അവശേഷിക്കുമ്പോള്‍ ലാഭമോ നഷ്ടമോ എന്നറിയാതെ പിരിഞ്ഞു പോകാന്‍ നാമടക്കമുള്ള ഒരാള്‍ക്കൂട്ടവും കാണും.അപ്പോഴേയ്ക്കും അടുത്ത തോട്ടില്‍ ബഹളം തുടങ്ങിക്കാണും ,നാം അവിടേക്ക് പായും .

__________________________________________________________________

കീബോര്‍ഡ് വിപ്ലവാന്നാ തോന്നുന്നേ ന്തായാലും ഇങ്ങനെയൊക്കെ പറയാന്‍ തോന്നി പറഞ്ഞു അത്രേന്നെ .

വിപ്ലവം എന്നത് വെറുംവാക്കല്ല , എന്നാല്‍ വെറുംവാക്കുകളെ വിപ്ലവമെന്ന ലേബലില്‍ വിറ്റഴിക്കുന്ന ഇടങ്ങള്‍ കൂടിവരികയാണ് . മതവും രാഷ്ട്രീയവും എല്ലാംതന്നെ വിളവുതിന്നുന്ന വേലികള്‍കൊണ്ട് പരസ്പരം മത്സരിച്ചും കൈകോര്‍ത്തുമൊക്കെ തഴച്ചുവളരുന്നത് അസാധാരണം ഒന്നുമില്ലാത്ത ഒന്നായ്‌ മാറിയിരിക്കുന്നു .

ചുളുങ്ങാത്ത കുപ്പായത്തില്‍ ഒരുവന്റെ കണ്ണീരൊറ്റ് അസഹിഷ്ണുത യാണ് മൈക്കിനുമുന്നിലെ അഭിനേതാക്കള്‍ക്കുംപല വാചകവീരര്‍ക്കും . അതുകൊണ്ടുതന്നെ സാധാരണക്കാരന്റെ ന്യായമായ ആവശ്യങ്ങളെ വിപ്ലവം എന്നപേരില്‍ കല്ലെറിഞ്ഞ് നിശബ്ദമാക്കുവാന്‍ ഇവര്‍ മത്സരിക്കുമ്പോള്‍ വിരോധാഭാസങ്ങളുടെ പെരുക്കപ്പട്ടിക ഒരക്കം കൂടി നിസ്സംഗതയോടെ കൂട്ടിയെഴുതുന്നു .

നാടോടുമ്പോള്‍ അതുക്കും മുന്നേ ഓടാന്‍നില്ക്കുന്നവന് നടുവൊടിഞ്ഞവന്റെ കരച്ചില്‍ കേള്‍ക്കാന്‍ സമയമില്ലാത്തതിനിനി ആരെ പഴിക്കണം നമ്മള്‍. ദൈവങ്ങളെ എല്ലാം പാട്ടത്തിനെടുത്തപോയ നാടാണ് നമ്മുടേത്‌ അനാഥമായ ജനതയെ അടിമയിരുത്തി വിലപേശുന്ന ഇടം.

കോടികള്‍ കൊയ്യുന്നവനുണ്ടോ കൊയ്ത്തുപാടം കരിഞ്ഞുപോയ വന്റെ വേദനയറിയുന്നൂ എന്ന നെടുവീര്‍പ്പിട്ട് ശുഭം എന്ന് എഴുതിക്കാണിക്കുവാനെങ്കിലും ആരെങ്കിലും ഒരിക്കല്‍ ചാട്ടയെടുത്ത് ചുഴറ്റുമോ എന്നറിയില്ല .

 

— feeling കീബോര്‍ഡ് വിപ്ലവാന്നാ തോന്നുന്നേ ന്തായാലും ഇങ്ങനെയൊക്കെ പറയാന്‍ തോന്നി പറഞ്ഞു അത്രേന്നെ .

 

 

ഇന്ത്യയുടെ പെണ്മക്കള്‍

മൂല്ല്യബോധമില്ലാത്തവന്റെ കഴിവുകേടാണ് പീഡനം ,
ഏതെങ്കിലും തലത്തില്‍ അവനില്‍ ഒരു മാനസികരോഗിയും മറഞ്ഞിരിക്കുന്നു .മാനുഷികതയുടെ അളവിനേക്കാള്‍ സാഡിസ്റ്റ് എന്നതിന്‍റെ അനുപാതം വളരെ കൂടിയ അളവില്‍ കാണപ്പെടുന്ന ഒരു ജനുസ്സില്‍ പെടുത്തി പഠനവിധേയമാക്കേണ്ടുന്നതും ഗൌരവപൂര്‍ണ്ണമായിക്കണ്ട് ചികിത്സ നല്കേണ്ടുന്നതുമായ ഒരു ജീവിവര്‍ഗ്ഗം .അതിവേഗം ഒരേ ചിന്താരോഗത്തിന്റെ ലക്ഷണം ഉള്ളിടങ്ങളിലൂടെ പടര്‍ന്ന് മനുഷ്യനെ വിവേകമില്ലാത്ത ഒരുതലത്തിലേയ്ക്ക് മാറ്റിയെഴുതുന്ന വൈറസ് ബാധ തന്നെയാണിത് . ചെയ്ത തെറ്റിന് മീതെ ന്യായീകരണങ്ങള്‍ നിരത്തുന്ന ഒരുവന്‍ കൂടി ആണെങ്കില്‍ പശ്ചാത്താപം ഇല്ലെന്നു മാത്രമല്ല ഇനിയും അതെ വഴിയെ തന്നെ സഞ്ചരിക്കും എന്ന ധാര്‍ഷ്ട്യം കൂടിയാണ് വെളിപ്പെടുത്തുന്നത് .
___________________________________________________________

പെണ്‍പ്രവാസം (മഹിള ചന്ദ്രിക )

ചിലരെ വായിക്കുമ്പോള്‍ അതിനോട് നമുക്കും ചിലത് ചേര്‍ത്ത് പറയണം ന്നു തോന്നും

പാടത്ത് കളകളുണ്ടെന്നു കാര്യസ്ഥന്‍റെ ആരോപണം .ഏദന്‍ തോട്ടത്തിലെ ജൈവ വൈവിദ്ധ്യങ്ങളില്‍ നിന്ന് വയലിന്റെ ഏകതാളത്തിലേയ്ക്ക് ജീവിതം മാറുമ്പോള്‍ നിങ്ങള്‍ വിതയ്ക്കുന്നതൊഴികെ എല്ലാം നിങ്ങള്ക്ക് കളകളാണ് . നിങ്ങള്‍ക്കുപകരിക്കുന്ന മട്ടില്‍ മാത്രം ജീവിതത്തെ കണ്ടുതുടങ്ങുമ്പോള്‍ സംഭവിക്കുന്ന അപകടമാണത് . ബാക്കിയുള്ളതൊന്നും നിലനില്ക്കേണ്ടതില്ലെന്ന ധാര്‍ഷ്ട്യം . ഭൂമിക്കൊന്നും കളയല്ല ,ഭൂമിയോളം വികാസം പ്രാപിക്കുന്ന ഹൃദയത്തിനും ഒന്നും കളയല്ല .അതിനു വേണ്ടിയാണ് ഉണരേണ്ടത് .

________________________Fr ബോബി ജോസ് ന്‍റെ ഒരു പുസ്തകത്തിലേതാണിത്
സമകാലീകമാണ് ഇത്തരം അക്ഷരങ്ങളില്‍ ആഞ്ഞു കത്തുന്ന വെളിച്ചം . 

ഒരു തലത്തില്‍ നോക്കിയാല്‍ ഓരോരുത്തരുടെ സ്വാര്‍ഥതയിലേക്കുള്ള അമ്പുകള്‍ മറ്റൊന്നില്‍ ഓരോ മതത്തിന്റെയും മേലാളന്‍മ്മാര്‍ ആണ് ഈ കാര്യസ്ഥ സ്ഥാനത്ത് ,

കുറഞ്ഞ വാക്കുകളില്‍ പങ്കുവയ്ക്കേണ്ട നന്മയെ പല പുറം കവിഞ്ഞു ചിലര്‍ ആവേശത്തോടെ അതിലേറെ ഉച്ചത്തില്‍ ഉപന്യസിച്ചു കൊണ്ടേ ഇരിക്കുന്നു .ഫലമോ മനുഷ്യന്‍ എന്ന യാഥാര്‍ത്ഥ്യബോധത്തില്‍ നിന്നും വെറും ഉപകരങ്ങണളെപ്പോലെ യാന്ത്രികതയില്‍ സ്വയം നഷ്ടപ്പെട്ടു പ്രതികരിച്ചു കൊണ്ടിരിക്കുന്നവര്‍ പെരുകിക്കൊണ്ടിരിക്കുന്നു .

പ്രോഗ്രാം ചെയ്യപ്പെട്ട ആശയങ്ങളെ ശരിയെന്നു സ്ഥാപിക്കുവാന്‍ മാനുഷികത മറന്നുള്ള ഭ്രാന്തമായ ഇടപെടലുകള്‍ .ബാക്കിയാകുന്നത് വെടിമരുന്നിന്റെ പുകമണക്കുന്ന ഇടങ്ങള്‍ പിന്നെ കുഞ്ഞുങ്ങളുടെയും കുടുംബം ചിതറിപ്പോയ വരുടെയും രക്തം മണക്കുന്ന കരച്ചിലുകളും .ജീവിതത്തില്‍ മുന്നിട്ടു നില്‍ക്കേണ്ടത് സ്നേഹമെന്നും ക്ഷമയെന്നും പരസ്പര ബഹുമാനമെന്നും ആവര്‍ത്തിച്ചു തെളിയിച്ചവര്‍ക്കുള്ള ബലികളില്‍ എത്രയെത്ര വിരോധാഭാസങ്ങളാണ് മുറിഞ്ഞൊഴുകുന്നത് !

ദൈവമെന്നു പറയപ്പെടുന്നവനേ ,
നിന്‍റെ പേരില്‍ മനുഷ്യനെ മയക്കുന്ന കറുപ്പിന്റെ കച്ചവടം പൊടിപൊടിക്കുക യാണല്ലോ ഉയരത്തിലിരുന്നു വിലപേശുന്ന വരുടെ ആര്‍ഭാടങ്ങളില്‍ വിശുദ്ധ വസ്ത്രങ്ങ ളില്‍ വേദവാക്യമുരുവിടുന്നവരുടെ ചൂതാട്ടകേന്ദ്രങ്ങള്‍ പെരുകിക്കൊണ്ടിക്കുക യാണല്ലോ !!!!!

_____________________________________________________________________________

മലയാളിയും......

ഏതു മേഖലയില്‍ ആയാലും മലയാളികള്‍ എങ്ങനെ മുതലെടുക്കാം എന്നത് മാത്രമാണ് ചിന്തിക്കുന്നത്. മേലനങ്ങാതെ അന്യായകൂലി വാങ്ങുന്ന കുറേപേര്‍ ,അവസരങ്ങളെ മുതലെടുക്കുവാന്‍ കാത്തു കഴുകന്‍മാരെ പോലെ ഒരു വര്‍ഗ്ഗം മറ്റൊരു ഭാഗത്ത്. അടിസ്ഥാന മേഖലയായ കൃഷിയെ പ്രോല്സാഹിപ്പിക്കുന്ന തിനോ അതിനു വേണ്ടി എന്തെങ്കിലും കാര്യക്ഷമമായി പ്രവൃതിക്കുന്നതിണോ നമ്മുടെ ഭരണ വ്യവസ്ഥ കാര്യമായി തുനിയുന്നില്ല.പഞ്ചായത്ത് തലത്തിലോ മറ്റേതെങ്കിലും തലത്തിലോ കര്‍ഷകരുടെ യഥാര്‍ഥ പ്രശ്നങ്ങളിലേയ്ക്ക് ഇറങ്ങി ചെല്ലുന്നതിനു ഇവര്‍ കൂടുതല്‍ ശ്രദ്ധിക്കേണ്ടതാണ്. സ്വന്തം സംസ്ഥാനത്തിന്റെ കാര്‍ഷിക മേഖലയെ അതിനര്‍ഹാമായ രീതിയില്‍ പ്രോല്സാഹവും സഹായവും ചെയ്തു വളര്‍ത്തുന്നതിനു പകരം ആരാന്‍റെ പത്തായത്തിലെ നെല്ലും വിഷം തിന്ന പച്ചക്കറികളും കൂട്ടി വയര്‍ നിറച്ചാല്‍ മതിയെന്നാ ണ് ഇവരുടെ യൊക്കെ പക്ഷം.കാശുണ്ടേല്‍ അരി അമേരിക്കെന്നും വാങ്ങാം എന്ന ചിലരുടെ നെഗിളിപ്പും നമ്മുടെ കൃഷിക്കാര്‍ക്ക് വെല്ലുവിളി തന്നെയാണ്.

ഇരിക്കുന്ന കൊമ്പ് മുറിക്കാന്‍ മടിയില്ലാത്ത മനുഷ്യര്‍ ..സ്വാര്‍ഥതയുടെ അനന്തര ഫലങ്ങള്‍ ഭീകരമായിരിക്കും ....... അറിഞ്ഞിട്ടും അറിയാത്ത ഭാവത്തില്‍ ഭൂമിയുടെ പച്ചപ്പ് ഊറ്റി വില്‍ക്കുന്നവര്‍ . നാളെയുടെ തലമുറകള്‍ക്ക് പ്രകൃതിയുടെ പ്രതികാരമായിരിക്കും പകരം നല്‍കുക .

പരിസ്ഥിതിവാദി.

പ്ലാസ്റ്റിക്പ്പൂക്കള്‍ വാക്കുകളില്‍
ബോണസായി മരങ്ങള്‍ മനസ്സില്‍;
ഞാനുമൊരു പരിസ്ഥിതിവാദി.

ഞാന്‍

സ്വപ്നാടനം പോലെ ,,,,പലരും നടന്നെത്തുന്നത് ഒരു സത്യത്തിലെക്കെന്നു മാത്രം,,,,പോകുന്ന വഴിയില്‍ ഓരോ പടവുകള്‍ ഋതുഭേതങ്ങള്‍ പോലെ ജീവിത ഋതുക്കളും മാറി മാറി വരുന്നു,,ഒടുവില്‍ വേനലില്‍ വറ്റിയ ഒരു കിണര്‍ കാണും അതിലേക്കു എത്തി നോക്കുമ്പോഴേക്കും ആരോ തള്ളിയിട്ടെന്ന പോലെ അതിന്റെ അഗാതതയിലെക്ക് വീണു പോകുന്നു,,,,,,,,,
ഞാന്‍ എന്നത് ഒരു തിരിച്ചറിവാണ് ,,,,,,,ചിലപ്പോള്‍ അവനവനിലെക്ക് തന്നെ തിരിഞ്ഞു നോക്കിയുള ഒരു ധ്യാനം ,,മറ്റുള്ളവരെ നോക്കിയുള്ള താരതമ്യവും
ചിലപ്പോള്‍ ഞാന്‍ എന്ന ശിഷ്ഠത്തെ കാണിച്ചു തരാറുണ്ട്.

പ്രണയം......

സ്വപ്നസഞ്ചാരത്തിന്റെ വാഹനം ആണ് പ്രണയം ...ചിന്തകള്‍ സ്വതന്ത്രമായി തടവറയില്‍ നിന്ന് ചങ്ങലകളില്ലാതെ അങ്ങനെ ഒഴുകി നടക്കും___ യാഥാര്‍ത്ഥ്യങ്ങളില്‍ നിന്ന് ചിലപ്പോലുള്ള ഒരു ഒളിച്ചോട്ടമാകാം പലപ്പോഴും അത്......വീഞ്ഞിന്റെ ലഹരി കണക്കെ നിമിഷങ്ങളെ കീഴ്പ്പെടുത്തുന്ന ഒന്ന്.
 
കലര്‍പ്പില്ലാത്ത പ്രണയം ഇപ്പൊ വംശനാശഭീഷണി നേരിടുകയാ .......ആഴം കുറഞ്ഞ മരീചികകള്‍ കണക്കെ അല്പായുസ്സുള്ള മഴത്തുമ്പികള്‍ പോലെ...പ്രണയം ഇന്ന് രോഗ ശയ്യയില്‍ .

മഴകളും മഞ്ഞും വെയില്പ്പൂക്കളും കടമെടുത്തു നിറമുള്ള മൌനവും ഏകാന്തതയുടെ സ്വര്‍ണ്ണ നൂലില്‍ പറ്റിയിരിക്കുന്ന കുഞ്ഞു പൂമ്പാറ്റകളും പ്രണയം ഒളിച്ചു വയ്ക്കുന്നു.....
നീറുന്ന മനസ്സില്‍ തൂവല്‍ തഴുകും സുഖം പോല്‍ ..കണ്ണടയ്ക്കുമ്പോള്‍ മിന്നിമായുന്ന പ്രണയ നൊമ്പരം.... അത് ലഹരിയാകുന്നുവോ.....
മഴയുടെ കണ്ണുകള്‍ കൈമാരുന്നതും പ്രണയം തന്നെ ...അടങ്ങാത്ത ആവേശം....
ചാപല്യവും കൌതുകവും...ഉണ്ടെന്നതും മിഥ്യയല്ല.

അതെ ഒരു മഴയുടെ എല്ലാ ഭാവങ്ങളും പ്രണയവും കടമെടുത്തിട്ടുണ്ട്
ഒരു തുള്ളി നീര്‍ കടമെടുത്തു മഴവില്ല് തീര്‍ക്കുന്ന പ്രണയ വെയില്‍.

   മരണമില്ലെങ്കിലും തീവ്രത കുറഞ്ഞു കൊണ്ടിരിക്കുന്ന ഒന്ന് ...ചില
 പ്രണയങ്ങള്‍ ഒരപവാദ മാകും എങ്കിലും.
പ്രണയം വര്‍ണ്ണങ്ങള്‍ കാണുവാന്‍ ആണ് ആദ്യം ശ്രമിക്കുന്നത്....നിറം                                          മങ്ങും  എന്നത് പതിയെ പുറത്തു വരുന്ന സത്യം.
 
പ്രണയം എല്ലാവരിലും പലപല അവസ്ഥയില്‍ ഉണ്ട് തിരിച്ചറിയപ്പെടുന്നവര്‍ അത് ചിലപ്പോള്‍ വളം കൊടുത്തു വളര്‍ത്തുന്നു,ചിലര്‍ അത് കാണാത്ത ഭാവത്തില്‍ കടന്നു പോകുന്നു.ശരീരങ്ങള്‍ തമ്മില്‍ എന്ന പോലെ...സ്വയം പ്രണയിക്കുന്നവരും നിമിഷങ്ങളെയും അവസ്ഥകളെയും പ്രണയിക്കുന്നവരും ഉണ്ടല്ലോ...
തീവ്രതയുടെ ഏറ്റക്കുറച്ചിലുകള്‍ എല്ലാ അവസ്ഥകളെയും പോലെ     പ്രണയത്തെയും ബാധിക്കും.
അനശ്വര പ്രണയങ്ങള്‍ ചരിത്രം എറ്റു വാങ്ങി കൈമാറും.....
പ്രണയം വരികളാക്കുന്നവര്‍ തനിക്ക്‌ ഏറ്റവും അധികം ഫീല്‍ ചെയ്യിക്കുവാന്‍ സാധിക്കുന്ന ഒരു മാധ്യമ മായാണ് അത് എടുക്കുന്നത് പലപ്പോഴും......പ്രണയം പറയുമ്പോള്‍ പലരും വാചാലമാകുന്നു. അത് എപ്പോഴും പൈങ്കിളി ആയിരിക്കണം എന്നില്ല.....ആ തീവ്രത അതില്‍ കൂടിച്ചേരുന്ന താനു സ്വാഭാവികമായും.ഏതു കാലത്തും മരിക്കാത്ത അല്ലെങ്കില്‍ മനസ്സില്‍ സൂക്ഷിക്കുന്ന ഒരു വികാരമാണല്ലോ അത്.
ബഹുജനം പലവിധം എന്നല്ലേ....... ശരിയാ എല്ലാര്‍ക്കും എല്ലാം ഉള്‍ക്കൊള്ളാന്‍ പറ്റ്വോ.....അവരുടെതായ രീതികളില്‍ ആസ്വദിക്കുകയും തള്ളിക്കളയുകയും ചെയ്യുന്നു....

പ്യൂപ്പ

പ്യൂപ്പയില്‍ നിന്ന് പൂമ്പാറ്റയിലെക്കെന്നതാണ് ജീവിതം ....
ബാല്യവും യൌവനവും നഷ്ട സ്വപ്നങ്ങളും എല്ലാം അതിന്റെ ഒരു ഭാഗം മാത്രം .
പാതി മുറിഞ്ഞ ഉറക്കം പോലെ ,ഒരു പിടി കരിയിലകള്‍ പോലെ നമ്മളുടെ ജീവിതവും.....ജീവനും.....

ഇവര്‍ കവികള്‍ ...എഴുത്തുകാര്‍ ...

ഒരു നേരമ്പോക്ക്,ചില സമയം സ്വയം രക്ഷപ്പെടല്‍,ഒരു ആശ്വാസം, ചിലതിലെക്ക് വിരല്‍ ചൂണ്ടി ശ്രദ്ധ ക്ഷണിക്കല്‍ ....ചിലപ്പോള്‍ ഒക്കെ ഒരു സ്വയം ചികിത്സ എന്നൊക്കെ പറയാം ......ചിലപ്പോള്‍ ഉപദ്രവവും മറ്റു ചിലപ്പോള്‍ വിഡ്ഢിത്തവും വിളമ്പി സമൂഹത്തില്‍ ഒരു ചലനം സൃഷ്ടിക്കുന്നവര്‍ അവര്‍.....,,,,,ആരെയും കാണിക്കാതെ മനസ്സിലെ വര്‍ണ്ണങ്ങള്‍ നിറം ചാലിച്ചും മങ്ങിയ നിറത്തിലും കോറിയിടുന്നു അവര്‍.....,,,,,,,,അംഗീകാരം കൊതിച്ചും ...ആകര്‍ഷണം ലക്ഷ്യമിട്ടും എഴുതുന്നവരും....ഇവര്‍ കവികള്‍ ...എഴുത്തുകാര്‍ ...

മരണം _____

പലരെയും കാഴ്ച വസ്തുവാക്കുന്ന ഒരു നാടകം...
കാണാനും കരയാനും ,ചിരിക്കാനും ,സഹതപിക്കുവാനും ആളെക്കൂട്ടുന്ന ഒരു തെരുവ് നാടകം.
സ്വന്തം മരണം മറ്റുള്ളവരുടെ മരണത്തിലൂടെ നേരിട്ടനുബവിക്കുന്ന ഒരു ത്രീ ഡി ഇഫെക്റ്റ്...
ആകുന്നു പലപ്പോഴും അത്....

നിമിഷങ്ങള്‍..

മണലില്‍ എഴുതിയ കഥകളീ ജീവിതങ്ങള്‍ അജ്ഞാത നിമിഷതിനായുള്ള കാത്തിരുപ്പിനിടയ്ക്ക് 
ഓര്‍മ്മകളുടെ വള്ളിയില്‍ ഊയലാടുന്ന ചില മിന്നാമിന്നികള്‍ .....നമ്മള്‍......

ചവറ്

ഇന്നിന്‍റെ വര്‍ത്തമാനത്തിനു
നാളെയുടെ ഭൂതകാലത്തിലേക്ക് സ്ഥാനമാറ്റം
ഇന്നലെയുടെ ഭാവി
ഇന്നിന്‍റെ വര്‍ത്തമാനത്തില്‍ വാചാലം
നാളെയുടെ വര്‍ത്തമാനം
ഇന്നിന്‍റെ ഭാവിയില്‍ മയങ്ങുന്നു
ഭാവിയിലൊരു ഭൂതം വര്‍ത്തമാനം പറയും..

മനസ്സിലിരുപ്പ്,

എല്ലാ മധുരങ്ങളും ഒരുദിവസം എരിയുമെന്ന്‍ തിരിച്ചറിയ പ്പെടെണ്ടിയിരിക്കുന്നു ല്ലേ ...... നഷ്ടപെടലിന്റെയും,വിരഹത്തിന്റെയും വഞ്ചനയുടെയും രൂപങ്ങളില്‍ അവ എരിവായ്‌ തീരും ....
മുഖം മൂടികളുടെ ലോകത്തില്‍ ,മധുരമായി ചതിക്കുന്നവരുടെ ഇടയില്‍ സത്യങ്ങള്‍ ശ്വാസത്തിനായ്‌ പിടഞ്ഞുകൊണ്ടിരിക്കുന്നു.........