ഓണമായ് വന്നത്

ഒരു ചെറുപക്ഷി വന്നെൻ്റെ 

ജനാലച്ചില്ലിൽ അതിൻ്റെ ഒച്ച കൊത്തി , 

ചൂടും ദാഹവും കൊണ്ടത് 

കിതച്ചൊതുങ്ങി നിന്നു. 

ഞാനൊരു പിടി ഗോതമ്പെടുത്തു 

ചെറുങ്ങനെപ്പൊടിച്ചു , 

ഒരു ചെമ്പരത്തി വട്ടത്തിൽ 

അതിൻ്റെ മുന്നിലിട്ടു , 

മറ്റൊരു പാത്രത്തിൽ 

തൊട്ടാൽ തൂവുന്നത്രയും 

വെള്ളവും 

നിറച്ചു കൊടുത്തു. 

വിശപ്പും ദാഹവുമൊതുങ്ങി 

ക്ഷീണം തീർന്നപ്പോൾ 

ആ ചെറിയപക്ഷി 

പറന്നു പോയതിൻ്റെ സന്തോഷം 

ഓണമായ് വന്നെന്നെയും 

സന്ദർശിച്ചു 

കടന്നുപോയിരിക്കുന്നു.