1. അച്ഛന്‍ വീട്ടിലെത്തും മുന്‍പേ ഇരുട്ടെത്തുന്നു
അടുക്കളയിലുമുമ്മറത്തും വെളിച്ചം നിറച്ച്
വീടതിനെ പുറത്തു നിറുത്തുന്നു .
_______________________________________
2. അപ്പുറത്തെ വീട്ടിലെച്ചേച്ചി
കരഞ്ഞു പാടുന്നതെന്താമ്മേ !
അമ്മയില്ലാതാകുമ്പോള്‍ പാടുന്ന പാട്ടാണ് കുഞ്ഞേ ,,
_______________________________________
3. രണ്ടുപേര്‍ സംസാരിച്ചുകൊണ്ടിരിയ്ക്കെ
മൂന്നാമതൊരാള്‍ കയറി വരുന്നു
നാലാമനൊരുവനെ
മൂവരും ചേര്‍ന്ന് ഓര്‍ക്കുന്നു .
_______________________________________
4. അകം പുറം വേവുമ്പോള്‍
ഉപ്പു തേകുന്നൊരീണം കുരുങ്ങുന്നു
അവര്‍ വേദന കുറുക്കുന്നു. .
_______________________________________
5. തനിയെ നടക്കുമ്പോള്‍
എന്‍റെതെന്നപോലെ കൂടെവരുന്നു
നിന്‍റെയോര്‍മ്മകള്‍ .
_______________________________________
6. നീയില്ല ഞാനില്ല
നമ്മുക്കിടയില്‍ കത്തിക്കൊണ്ടിരിയ്ക്കുന്ന
ഈ മെഴുകു വെളിച്ചം പോലുമില്ല ,
ശ്വാസമടയുമ്പോള്‍ .
_______________________________________
7.ഒരു വാക്കിന്‍റെ ദൂരത്തില്‍
മറുവാക്കില്ലാതെ നാം
തനിച്ചിരിയ്ക്കുന്നു.
_______________________________________
8. പ്രണയത്തില്‍
ഒരു കുടകൊണ്ട്‌ മഴപകുത്തവര്‍ നാം
ഇന്നിരുകുടകളില്‍
വെയിലേറ്റ് വിയര്‍ക്കുന്നു .
_______________________________________
_______________________________________
9. വെയിലേറ്റു കിടക്കുന്ന കുളത്തില്‍ നനയുന്ന
കുടയുടെ ഇത്തിരിനിഴല്‍ ,
നമ്മുടെ പ്രണയം.
_______________________________________
10. ദാഹം തീരെ വേനലിനി പുഴ കുടിയ്ക്കട്ടെ
വരൂ ,നമുക്ക് ഈ തരിശുനിലത്തിരിന്നു
വിശപ്പു പങ്കിടാം .
_______________________________________
11. കുത്തരിച്ചോറില്‍ നിന്നാവി പരക്കുമ്പോള്‍
എന്‍റെ വാക്കില്‍ ഞാന്‍ നിന്നെ ,അടയാളം വയ്ക്കുന്നു .
ഓര്‍മ്മയില്‍
മുറ്റത്തെ ചാമ്പചോട്ടില്‍ പുന്നെല്ലുപുഴുങ്ങുന്ന
മുത്തശ്ശിച്ചെമ്പ് തെളിയുന്നു .
തട്ടിന്‍ പുറത്തെ പാത്രസദനത്തിലെ ക്ലാവ് മണക്കുന്നു .
___________________________________________
12. ഒരു കവിതയില്ലാത്തവള്‍ എന്ന ചീത്തപ്പേര്
കഥയില്ലാത്തവള്‍ എന്നുള്ളതിനേക്കാള്‍
മോശപ്പെട്ടതാണ്,അതിനാല്‍ എന്‍റെ വാക്കില്‍ ഞാന്‍ നിന്നെ ,അടയാളം വയ്ക്കുന്നു .
_______________________________________
13. ഒരു പുഞ്ചിരിക്ക് മറുപുഞ്ചിരി തന്നു ഞാന്‍ കടം വീട്ടുന്നു .
13. ഒരു പുഞ്ചിരിക്ക് മറുപുഞ്ചിരി തന്നു ഞാന്‍ കടം വീട്ടുന്നു .
____________________________________________
14 . വയല്‍മണം മൂക്കുമ്പോള്‍
യൌവ്വനത്തെ
അതിന്റെ കുട്ടിക്കാലത്തിലെയ്ക്ക് ഞാന്‍
അഴിച്ചു കെട്ടുന്നു .
_____________________________________________
15. പുലരിയില്‍ ഞാന്‍ കുഞ്ഞ്
ഉച്ചയില്‍ ഉച്ചിയുറച്ചവന്‍
സായാഹ്നം വീണ്ടുമെന്നെ വൃദ്ധനാക്കുന്നു
രാത്രിയില്‍ ഞാനെന്റെ അമ്മയുടെ
ഗര്‍ഭപാത്രത്തി ലെയ്ക്ക് മടങ്ങുന്നു .
_______________________________________
16. ആകാശത്തിന്‍റെ നീല നിറമില്ല ,തണുപ്പില്ല
കടലിന്‍റെ ഉപ്പും ഹൃദയത്തിന്‍റെ ചൂടും
കണ്ണിലെ മഴ !
____________________________________________
1 7 . മഞ്ഞു വീഴുന്ന നദിക്കരയില്‍
ഇളം വയലറ്റ് പൂക്കളുമായ്‌
ചേര്‍ന്ന് നില്‍ക്കുന്ന മൂന്നുമരങ്ങള്‍ .
പ്രഭാതത്തിലെ ഹൈക്കു .
_____________________________________________
1 8 . ആകാശം ഇളം നീലനിറമുള്ള അതിന്റെ പുഞ്ചിരി
നിവര്‍ത്തുമ്പോള്‍
ശലഭങ്ങള്‍ പാറുന്ന താഴവരയില്‍
മഞ്ഞപ്പൂക്കള്‍ക്കു മേലെ നാം കൈകോര്‍ക്കുന്നു .
_____________________________________________
19. ദേവാലയ മണി മുഴങ്ങുമ്പോള്‍
ഇരട്ടറോസാപ്പൂക്കളടര്‍ത്തി
നിന്നെ കാത്തിരിയ്ക്കുന്നു ,കൂട്ടിനൊരു മഴയും .
____________________________________________
20. സായാഹ്നം
അയല്‍ക്കാരന്റെ ചായ്പ്പില്‍
കിളിക്കുഞ്ഞുങ്ങളുടെ ഒച്ചകൂടുന്നു .
_____________________________________________
No comments:
Post a Comment
" നന്ദി സുഹൃത്തെ ഈ വഴി വന്നതിനും വായനക്കും അഭിപ്രായങ്ങള്‍ക്കും ഇഷ്ടങ്ങള്‍ക്കും ഇഷ്ടക്കേടുകള്‍ക്കും "