മുറിവേറ്റിരിക്കുന്നു

ഹൃദയം  കൊണ്ട്  ഞാനവരെ  സ്നേഹിച്ചു 

ജീവനില്ലാത്ത  ചിരികള്‍ 

അവരെനിക്ക്  പകരം  തന്നു .

വിഷം  വച്ച ചിന്തകളുടെ  ഉള്ളിടങ്ങള്‍ തെളിയുന്നു 

ചില ഇഷ്ടങ്ങളിലേയ്ക്ക്  ഞാനെന്‍റെ 

വാക്കുകളെ കറുപ്പുടുപ്പിക്കുന്നു ,

ആഴത്തിലേയ്ക്കൊരു നിശബ്ദതയെ 

പടവുകളിറക്കുന്നു .

ചിരിയിലും ചിന്തയിലും 

മായം  കലരുന്നതറിയുന്നു,

അവരെയറിയുന്നു ,

എന്തെന്നുമേതെന്നും 

കടുംമഷിയില്‍ തെളിയുന്നു .

അത്രമേലിഷ്ടം എന്നെഴുതിയുറപ്പിച്ച 

സ്നേഹത്തിന്‍ പാട്ടില്‍ 

അനിഷ്ടത്തിന്‍റെ വിചിത്രയൊച്ചകള്‍ 

നിറയുന്നു ,

പതറുന്നു ,ചിതറുന്നു ഈണവും .

പാഴ്ച്ചെടികള്‍ മുളപൊട്ടിയ 
വെറുംകാലം 

ഞാനൊരു 
രാക്കിളിയുടെ ചുണ്ടില്‍ തൂക്കിയിടുന്നു 

പുലരിയ്ക്കു മുന്പെയാപക്ഷി 

അതുമായ് പറന്നകലുന്നു ,

ഞാനെന്‍റെ  കൂട്ടില്‍  

മുറിവേറ്റിരിക്കുന്നു .

____________________