മറന്നുപോകുന്നത്

കയ്പ്പിന്‍റെ 

കുതിരവേഗത്തിനു പുറകെ 

മധുരത്തിന്‍റെ 

കാളവണ്ടിച്ചക്രങ്ങള്‍ 

തെന്നിത്തെറിച്ചു 

നമ്മിലേയ്ക്ക് എത്തിച്ചേരുന്ന 

നിമിഷങ്ങളുണ്ട്‌ .

ഓര്‍മ്മകളുടെ 

ഒരുകുടം നോവില്‍ നിന്നും 

സന്തോഷത്തിന്റെ 

ഒരു നുള്ള്

മധുരത്തിലേയ്ക്ക് 

പറിച്ചുവയ്ക്കുന്ന 

ഉറുമ്പുകളുടെ 

വരിയനക്കങ്ങള്‍ പോലെ 

കയര്‍ മുറുക്കത്തില്‍ നിന്നും 

അമ്മയുടെ അകിടിലെയ്ക്ക് 

സ്വതന്ത്രമാക്കപ്പെടുന്ന പശുക്കിടാവിന്‍

ആത്മനിര്‍വൃതി പോലെ .......

ഓര്‍മ്മകള്‍ ഓരോന്നും 

ഉപ്പുനീര്‍ തൊട്ടെണ്ണിപ്പോകുന്നതിനിടെ 

മറന്നുപോയല്ലേയെന്നെ യെന്നു 

നിലത്തു വീണു പരിഭവിക്കുന്നുണ്ട് ,

മനപ്പൂര്‍വ്വം മറന്നുവച്ചൊരു 

പൊന്‍പണം 

************************