വെളിപാടുകളുടെ താഴ്വര

ചിറകുവച്ചു പറന്നു 

കൂടെപ്പോരുന്നു ചിലത് 

ഞാനതിനെ 

ഈ നിമിഷത്തിന്‍റെ വസന്തത്തില്‍ 

തുന്നിച്ചേര്‍ക്കുന്നു .

പുഴുവിലേയ്ക്ക് 

തിരിച്ചു പോകുവാനാകാത്തവിധം .

ചിലതങ്ങിനെയാണ് 

എത്രദൂരം കൂടെ സഞ്ചരിച്ചാലും 

കണ്ണുകള്‍ തമ്മില്‍ കോര്‍ത്തു പോകുന്നത് 

അത്രയും യാദൃശ്ചികം 

എന്നപോലെയായിരിക്കും 

കൈവിരല്‍ മുറുക്കവും പട്ടവും മാത്രം 

ബാക്കിയാക്കി 

പിന്നിട്ട ദൂരങ്ങളുടെ 

ആ ചരട് 

അപ്രത്യക്ഷമാക്കുന്നു .

അപ്രതീക്ഷിതമായ് 

മഴ നനയുന്ന ഉച്ച പോലെ 

വഴികള്‍ , ദൂരങ്ങള്‍ ,കാഴ്ചകള്‍ 

എല്ലാം നനയുന്നു വിതുമ്പുന്നു 

പിന്നെ 

ആകാശവും ഭൂമിയുമെന്നപോലെ

ആലിംഗനത്തില്‍ ഒന്നാകുന്നു .

അതിരുകള്‍ ,കാഴ്ചകള്‍ 

ദൂരങ്ങള്‍ സ്വതന്ത്രമാക്കപ്പെടുന്നു 

ഞാനും നീയും 

നമ്മിലേയ്ക്ക് കൈകോര്‍ക്കുന്നു .

__________________________