8.27.2012

haikku ......................

രാവിനെ
രാകിരാകിത്തളരുന്നു
ചീവീടുകള്‍ .
****************************
ശാന്തമായ്‌
ഉരുകുന്നൊരു
മെഴുതിരി .
******************************
ചില്ലുകൂട്ടിലെ വെള്ളാരംകണ്ണുകളോടു
ചങ്ങാത്തം കൊതിച്ച്
തെരുവുബാല്യം .
********************************
വിസ്മൃതിയുടെ വള്ളിയില്‍
പൂത്തു കൊഴിയുന്ന
ഓര്‍മ്മപ്പൂക്കള്‍.
********************************
മടിപിടിച്ചുറങ്ങുന്ന
വികൃതി ചെറുക്കന്‍
പുലരി.
********************************
ചിതറിത്തെറിച്ച
നിലാത്തുള്ളികള്‍
മാനത്ത്.
*********************************
ഇരുള്‍ശിലയില്‍ നിന്നും
പകലിന്നുടല്‍ കടഞ്ഞെടുക്കുന്നു ,
സൂര്യശില്‍പ്പി .
**********************************
വെയില്‍നിലാവ്
കുടിച്ച് തളര്‍ന്ന
ഒരിളം പൂവ്.
*************************************
വര്‍ണ്ണങ്ങള്‍
ഇരുളില്‍ ഒളിപ്പിച്ച്
മുഖംകനപ്പിക്കുന്നൊരു രാവ്
*************************************
നിദ്രയുടെ ചില്ലകളില്‍
കൂടുമെനയുന്ന
സ്വപ്നക്കുരുവികള്‍...
*************************************
ഇരുട്ടില്‍
ഒരോട്ട തുളയ്ക്കുന്ന
ചൂട്ട്
*************************************
വളര്‍ത്തുമക്കളെയെല്ലാം
കെട്ടിച്ചയക്കുന്നു
വയലമ്മ .
*************************************
ഉരുകിയുറഞ്ഞൊരു
പകല്‍പ്പൊട്ട്
മാനത്ത് .
*************************************
ഇലകളില്‍
ഒരാകാശമൊളിപ്പിച്ച്
ഇല്ലിത്തലപ്പുകള്‍ .
*************************************
ഗൃഹാതുരതയുടെ
ഭാണ്ഡം പേറി പാണനാര്‍ ചമയുന്നു ,
വര്‍ത്തമാനകാലം
**************************************
വിണ്ട മണ്ണിനെയും
വരണ്ട സ്വപ്നങ്ങളേയും
ചേര്‍ത്തു തുന്നുന്നു മഴനൂലുകള്‍. ...
**************************************
ഒഴിഞ്ഞ
വലയുലച്ചു പരതുന്നു
വിശന്നുവലഞ്ഞൊരു കാറ്റ് .
**************************************
വെള്ളിദണ്ഡ് കൊണ്ടീ
ഇരുള്‍മരങ്ങളെ വകഞ്ഞു നീക്കി
ചന്ദ്രികയൊഴുകുന്നു .

Balram Cheruparambil____
Silver stream,
Splitting the dark woods in twain,
Moon beaming down.
***********************************
മഴമണം
ഒളിക്കുന്നു ;
ഇഴകളില്‍.
***********************************
എകാന്തമീ രാക്കൂട്ടില്‍
വിരഹമുറിവില്‍
വിങ്ങുന്നു നിന്നോര്‍മ്മ.
***********************************
മൌനത്തിന്‍ ബലിക്കല്ലില്‍
പ്രണയസ്വപ്നങ്ങളുടെ ;
ജീവത്യാഗം.
***********************************
അഭ്യാസവും ആഭാസവും
ജീവിതം ഒരു
ഞാണിന്മേല്‍ ക്കളി.
***********************************
ചായം മുക്കിയ
വാക്കുകളുടെ ചേലചുറ്റിച്ച്
നീയെന്നെ വലയ്ക്കുന്നുവോ....
*********************************
Love writes a transparent
calligraphy,so on
the empty page my soul
can read and recollect....

തെളിവാര്‍ന്ന ലിപികള്‍ കടഞ്ഞ് ഞാന്‍
ആത്മാവിന്‍ വെളുത്ത താളില്‍ വിതറുന്നു പ്രണയം,
ഒരു മാത്രയെങ്കിലും നിനക്കോര്‍മ്മിക്കുവാന്‍.
_എന്‍റെ ട്രാന്‍സ്‌))00))_
*****************************
കൈയ്യടികള്‍ക്കിടയിലും.
ഒറ്റവിരലിന്‍റെ;
ധ്യാനം .
*****************************
ഓര്‍മ്മക്കൂട്ടില്‍ നിഴല്‍ച്ഛായ തീര്‍ത്ത്‌
വര്‍ണ്ണപക്ഷിയുടെ
ചിറകൊച്ച .
******************************
അഴകിന്‍ കാനനപ്പുഷ്പ്പം 
വിടര്‍ന്നചെഞ്ചുണ്ടില്‍ ,
നീല വനഗന്ധം നുകരുന്നു ശലഭക്കണ്ണുക ള്‍.
*******************************
പകലിനു
ചിതയൊരുക്കുന്നു ,
അസ്തമയം.
********************************