നിശബ്ദതതയുടെ അറകളില്
വാക്കുകളുടെ ഒരുതിരി
ധ്യാനമിരിക്കുന്നുണ്ട്
അനന്ത വിഹായസ്സിലെ
വെളിച്ചത്തിന്റെയും ഇരുളിന്റെയും
ഇഴകള് വേര്തിരിച്ചു
ഭൂമിയുടെ ഉറവകളെ തൊട്ടുനോക്കി
പക്ഷിയുടെ ചിറകില് പറ്റിയിരുന്ന്
യാത്രപോവുകയാണ്
ഒരു മൌനം.
ചവച്ചു തുപ്പിയ വാക്കുകളില്
ചോര മണക്കുന്ന ദീര്ഘങ്ങള്
പിടഞ്ഞു വീഴുന്നത്
പ്രതികാരത്തിന്റെ
ഉയര്ത്തെഴുന്നേല്പ്പിലേക്കായിരുന്നു .
മുറുക്കിത്തുപ്പിയ ചില്ലക്ഷരങ്ങള്
നിസ്സഹായതയുടെ ആഴങ്ങളിലേയ്ക്ക്
വലിച്ചെടുക്കപ്പെട്ടത്
പുതു അര്ത്ഥങ്ങളെ
ഗര്ഭം ധരിച്ചായിരുന്നു.
മൌനത്തിന്റെ ശംഖിലേയ്ക്ക്
ഒളിഞ്ഞു നോക്കിയ കാറ്റില്
പുളഞ്ഞുണര്ന്നതു
നോമ്പ് നോറ്റിരുന്ന സത്യങ്ങളുടെ
തിരയിളക്കങ്ങളും .
അടച്ചു വച്ച ചിന്തയുടെ
പുസ്തകങ്ങളില് നിന്നും
ഇറങ്ങി വരുവാന് മടിച്ചു
ഒരു കൂട്ടം അക്ഷരയോഗികള്
മൌനമന്ത്രങ്ങള് ജപിക്കുന്നുണ്ട്.
ചിന്തയുടെ മൌനത്തിലെയ്ക്കു
തെന്നി വീണ അക്ഷരത്തരികള്
ഉറഞ്ഞ അര്ത്ഥങ്ങളില് പറ്റിയിരുന്ന്
ചിണുങ്ങുകയാണ് .
അപ്പോഴും
ഉറക്കത്തിന്റെ താളുകള് ചേര്ത്തടുക്കി
ഒരുപിടി ഓര്മ്മമണംഞാന്
നെഞ്ചോടു ചേര്ക്കുന്നുണ്ടായിരുന്നു .
______________________________
No comments:
Post a Comment
" നന്ദി സുഹൃത്തെ ഈ വഴി വന്നതിനും വായനക്കും അഭിപ്രായങ്ങള്ക്കും ഇഷ്ടങ്ങള്ക്കും ഇഷ്ടക്കേടുകള്ക്കും "