3.30.2014

ഹൈക്കുസ് പോല്‍

ഇന്നീ
വേനല്‍ക്കാല കവാടത്തി-
ലേകസഞ്ചാരി
മഴ !
_______________________

മഴകൊണ്ട മഞ്ഞപ്പൂക്കള്‍
നിലത്തിട്ട കുറിമാനം ,
ചിരിയുപേക്ഷിച്ചിരിക്കുന്നു
_______________________

മഴയ്ക്കപ്പുറം
വെയിലുണരുന്നു
ഒരുകാലം കടഞ്ഞെടുക്കുന്നു
_________________________

ഇടവഴികള്‍ക്കെല്ലാം
ഇരുട്ടിന്‍ മുഖം
ഇനിയുമിരുളാതൊരു ജാലകം
________________________


 ഇരുള്‍ മുറിയവേ
കിളിയൊച്ചകളൊഴുകുന്നു
നിദ്രയുണരുന്നു ജാലകങ്ങള്‍

__________________________
 

പുലരിക്കു കുറുകെ
മഞ്ഞു മേഞ്ഞിരുന്നു
ഞെട്ടിലടരാതൊരു വസന്തവും ,
നരച്ചു പോയത് .

_________________

മഞ്ഞു പോലൊരുണ്ണി  
മറുക് പോലോരമ്മ !
_________________________

മരണമുണ്ടെന്നുറക്കെ 
നിഴലിനെ വെയിൽപ്പെടുത്തുന്ന 
നട്ടുച്ചകൾ
________________________
  
ആകാശം മിന്നുന്നോ-  
രാമ്പല്‍ക്കുളം ,ഇന്നതിലൊരു   
അലിയാത്ത വെണ്ണക്കുടം   
____________________________
 

ഒരു പ്രഭാതം 
പൂവങ്കോഴിയുടെ ഉണര്‍ച്ചയില്‍
മുറിവേല്‍ക്കാതെ
_________________________
 

വാതിലടയ്ക്കും മുന്‍പേ
കാലൊച്ച പടികടന്നെത്തി
ഇരുട്ടിനി പുറത്തു നില്‍ക്കട്ടെ

_________________________

വിയര്‍ക്കുന്ന മകരം
കാത്തു വച്ചിട്ടും
കരളു കുതിര്‍ത്തവള്‍ക്കായ്

 _______________________


നീലച്ചുമരുകളില്‍
യൌവ്വനം തീര്‍ന്നുപോയെന്നൊരു
കാലത്തിന്‍ കുറിപ്പ്



 _______________________


കല്‍പ്പടവുകളിറങ്ങുന്നു
കാലോച്ചകളില്ലാതെ മഞ്ഞ് 
ധ്യാനത്തിലൊരു കുളം

 ______________________

ഒരു രാത്രി നിറയെ 
നിഴലുകളുണര്‍ന്നിരിക്കുന്നു
ഇലകളുറങ്ങുന്നു
____________________

മഞ്ഞുകാലത്തെ ചന്ദ്രന്‍  
ബധിരന്റെ കണ്ണുകളില്‍  
സംഗീതം
_______________________ 

ഒരുമുഴം നിദ്രക്ക് മീതെ 

കനത്തും കുളിർത്തും രാത്രി 
മുല്ലപൂക്കുന്നു
____________________________________