"മൌനങ്ങളില്‍ നിന്ന് കണ്ണുതുറക്കാം "-ചന്ദ്രിക റിപ്പബ്ലിക്‌ദിന പതിപ്പ് 2013

മൌനത്തിലേക്ക്

ചിറകൊതുക്കുന്ന പക്ഷീ

ഏതു മലകള്‍ക്ക് മീതെ-

പ്പറന്നപ്പോഴാണു നീ

പുഴയുടെ നിലവിളി കേട്ടത് ....

മഞ്ഞുമുക്കുത്തികളിട്ട

താഴ്വരയ്ക്കു കുറുകെ

ആ അടയാളവും

മായ്ച്ചുകളയപ്പെട്ടുവോ ,,?

വഴിതെറ്റി ഇനിയാ ഋതുക്കള്‍

അലഞ്ഞു തിരിയും

പിന്നെ

മൌനം കുടിച്ചു കുടിച്ചവര്‍

നിശ്ചലരാകും .

നിന്‍റെ ആര്‍ദ്രതയുടെ

അത്ഭുതപ്പാത്രവും

ഉടച്ചെറിയപ്പെടുന്ന

യാമങ്ങളിലേക്കെത്തും മുന്‍പ്‌ ,

തെരുവുകളുടെ സിരകളിലൂടെ

ആരാധനാലയങ്ങളുടെ

മേല്‍ക്കൂരകളില്‍ നിന്നും

മതത്തിന്‍റെ വീഞ്ഞ് നീ

ഒഴുക്കിക്കളയണം .

മനുഷ്യനെ

മനുഷ്യത്വത്തിന്‍റെ ഉടുപ്പുകളിലേക്ക്

വാരി നിറക്കണം .

കുഞ്ഞുങ്ങളുടെ ചിരിയില്‍ നിന്നും

നിഷ്കളങ്കത തൊട്ടെടുത്തു

എനിക്കും നിനക്കും വേണ്ടി

ആദിപാപത്തിന്റെ വടുക്കള്‍

മായ്ച്ചു കളയുന്ന

തൂവാല നെയ്യ്തെടുക്കുവാന്‍ ,

അര്‍ദ്ധനഗ്നനായിരുന്നവന്‍റെ

ചര്‍ക്കയുടെ താളമിനി

വഴികാട്ടിയാകട്ടെ .

പ്രാര്‍ഥനകളില്‍ നിന്ന് ,

മൌനങ്ങളില്‍ നിന്ന് ,

നമുക്കിനി കണ്ണ്തുറക്കാം .

ചിറകൊതുക്കിയ

പക്ഷിയുടെ കൊക്കില്‍

സമാധാനത്തിന്‍റെ

ഒലിവുതളിരുകള്‍

മണക്കുന്നു .

ഏദന്‍തോട്ടത്തിലിപ്പോള്‍

വാതിലുകള്‍

തുറക്കപ്പെട്ടിരിക്കുന്നു .

നന്മതിന്മകളുടെ

ചുവന്നകനിയും സര്‍പ്പവും

ശിലാരൂപത്തിലേക്ക്

ഉളിയൊച്ചകളിലൂടെ

കുമ്പസാരിക്കുന്നു .

പാപത്തിന്‍റെ നീല ഞരമ്പ്‌

പുണ്യനീരൊഴുകുന്ന അരുവിയായ്‌

ഭൂമിയിലൂടൊഴുകുന്നു .

_____________________